Gelemşe

​Qepqepa pêlava jinên bedew û nebedew
Her yek xwe dihejîne, ji derdorê qêrînê tîne
Ne ew lê qabikên pêlavên wan
Gazî dikin; ez li vir im, bi hemû serêşiya xwe
Dengê qedehên çayê,
kevçiyên çayê
xirecireke vala
û nûçeyên keştî, moşek û dewaran
Dewarên ku nebûne mijar
lê bûne xwediyê mijarê
..
Çi bûye, kes nizane
Lê her daxuyanî,
slogan û ​dîmen in.
Girseyek li bendî wê ne
ku ji tiştekî re, ji bûyerekê re bibêjin" bijî"
û wêneyên xwe di torên bextewariyê de
parve bikin..
Mirineke hêdî ye
Bendewariyeke bikoletî ye
lê jiyan jixwe ev e
gurmgurm û teqreq e